Louisa Thuketana

Louisa Thuketana a kuri nghamu ya mufundhisi na mutsari wa tibuku ta Xitsonga, nkulukumba F.A Thuketana. Thuketana u kongomise marito yo rhanga ya tibuku ta yena ku khensa nsati wakwe loyi a n'wi seketeleke eka vutsari byakwe.

Louisa Thuketana
Vutomi
Ntirho

Rito ro rhanga eka buku ya "Ndzi ngo tinciki!"

Eka nhonga yanga ya matsema
Wena nhonga yanga ya matsema, wena manemba-tinxiyi, mafaneriwa-hi-ku rhomba nkata mina. Ndzi vula wena Shilavi ntukulu wa Jonasi wa Maphophe. Ntumbuluko wu alele gwambe na Dzhavana, wu te nikiniki! Swe mbilwini ya munhu a swi tive hi ye n'wini, un'wana munhu a nga swi tivi. A a swi aba-ambele ni ku swi kumbetela kunene, hi ku hlela marito, hi ku ma hluta ni hi ku xiyaxiya swiendlo.

Mbilu ya munhu i lwandle, mbilu ya mina i nyoxi wena N'wa-Louis, wansati-makhunela. Yi lo eka wena yo phatsa, hikuva hi mpfhuka u ndzi humesa elawini, mina na wena hi vuhlalu ringana ni ngoti. Marito ni swiendlo swa wena, i swa wansati la rhandzaka nuna wa yena hi rirhandzu ra rixaka ra rona, rirhandzu leri pfumalekaka, rirhandzu lero tat xirhundzu ni rihlelo. Ina i ntiyiso wena nhonga yanga ya matsema, rirhandzu ra wena eka mina a ri vanga xiange-ange xa siku rin'we, i rirhandzu leri ra ha thlithlaka ni ku phukuma ni swesi, endzhaku ka khu-mbirhi wa malembe lam taleke.

Xana rirhandzhu relero ndzi ta ri khensa hi yini wena mana wa vananga? Ndzi ta ri khensa hi yini leswi risima ni nkoka wa rona swi ndzi hubaka mano, swi ndzi hundzulaka munhu wo hanya hi makoko, munhu wo phuma xifuva? Ina, wenq nhonga yanga ya matsema, marito ya mina ya kayivela, ya tsandzeka ku fikelela eka leswi mbilu a yi ta swi phofula loko onge nomu yi nyikiwile. Ndzi hava xikhenso lexi nga ringanaka kumbe ku fikelela ntikelo wa rirhandzu ra wena eka mina. Hmabi swi ri tano wena nhonga yanga ya matsema, amukela nyikonyana hi leyi, i xibukwana lexi ndzi xi mpfampfarhuteke u ri miehleketweni. Kunene xi nga ka xi nga fikeleri evurhandza-hi-mbilu. Ntsena tsundzuka knatanga, tsundzuka leswaku vukulu bya nyiko a hi byona byi nga ni nkoka ngopfu, lexi nga ni nkoka ku tlurisa, hi mbilu leyi hisekelaka ku nyika. Hikwalaho ndzi nge amukela, xibukwana lexi hi mandla mambirhi. Mixlaphungana, milorho, milombyana, mijamujamu ni muhuhudyana ya byongo bya mina nuna wa wena, a swi ku hungate, swi ku susa xivundza hi nkarhi wa ku vundza.

Ina, na mina ndzi ri tano Muhlengwe ndziwena, ndzi ri ndzi ngo tinciki! Ku ri ni ku ku xokola, ndzi la ku susa laha u khomaneke kona, emakorhweni ya mbilu ya mina, ri nga tiko leri u fumaka eka rina hi rirhandzu ra muxaka wa rona, rirhandzu lero tenga, rirhandzu ro pfuma swihesi ni swindodzwi.

— F.A Thuketana, 26 Ndzhati 1986